Skip til hoved indholdet

Tusagassiorfinnut nalunaarutit uani atuarfinnaavatit

Tusagassiorfinnut nutaarsiassat kingulliit

  • Aajuna Iserit A/S'p tusagassiorfinnut akissutaa ulloq 12. januar 2023, ulloq 20. januar 2023 sermitsiaq.ag-mi ilanngunneqanngitsoq:Kollegiani ineqartoq: Inissiaq najugarisassaanngitsoq 


    Iserit A/S´imi inissiat attartortunut neqeroorutigineqannginneranni qanoq ittuunissaannut tunngatillugu suut piumasaqaataappat?

    • "Inissiamik innersuussisoqannginnerani Iserit suleriaatsinik malinneqartussanik makkuninnga piumasaqaateqarpoq:

    1.  Inissiamit nuuttoqartillugu Teknikerimit imaluunniit Inspektørimit takuniaasoqassaaq
    2. Siornatigut inissiami imermik isaasoqarsimatillugu imaluunniit isugutammik ajoqusertoqarsimatillugu R&T imaluunniit ACS inissiap iluani silaannarmik misissuiteqqinneqassapput, malitsigisamik ajoqusertoqarsimaneranik takussutissaqarnersoq paasiniarlugu. Tamanna Iserit R&T-mut imaluunniit ACS-imut aalajangersimasumik akeqartussatut isumaqatigiissutaavoq.
    3. Innaallagissamut atortut, ruujorit sanasullu suliaat misissorneqassapput inissiap qanoq inneranik nalilersuereernerup kingornagut. Tamanna Iserit suliffeqarfinnik/sanasunik assigiinngitsunik aalajangersimasumik akeqartussatut isumaqatigiissuteqarneranit isumaqatigiissutaavoq.
    4. Iserit inissiamik nalinginnaasumik aserfallatgsaaliissaaq. Tamanna Iserit qalipaasunik assigiinngitsunik isumaqatigiissuteqarnearni aalajangersimasumik isumaqatigiissutaavoq.
    5. Inissiaq naammassillugu aserfallatsaalineqareerpat, R&T-mit inissiap ilua inaarutaasumik misissorneqassaaq. Nalunaarusiaq inissiamik attartortumut nutaamut tunniunneqassaaq, inissiap uagut minnerpaaffissatut piumasaqaativut naapertorlugit aserfallatsaalineqarsimaneranut uppernarsaatitut."


    Iserit A/S´ip aqutaanik ilinniartut najugaqarfiisa qanoq ittuunissaanik piumasaqaatit suuppat, ilinniartut najugaqarfiata ilinniartunut neqeroorutigineqannginnerani malinneqartussat?

    • "Inuusuttunut inissianik ilinniartullu najugaqarfiinik nalinginnaasumik aserfallatsaaliineq assigiinngillat, taakkua sivikinnerusumik attartorneqartarnerat pissutigalugu. Inuusuttunut inissiat ilinniartullu najugaqarfiisa iserterfigineqannginneranni innaallagissamut ruujorinullu atortulersuutit atorneqarsinnaasunngortinneqartarput. Tamakkua saniatigut inissiat atorsinnaasunngortinneqartarput pequtai sanasullu suliaat eqqarsaatigalugit. Qalipanneqassapput aatsaat nalilerneqarpat tamatuminnga pisariaqartitsisoqartoq. Taamaattumik attartortittakkatut inissianut periuserisatta saniatigut inuusuttunut inissianik ilinniartullu najugaqarfiinik tamakkiisumik aserfallatsaaliuisoqarnissaa qaqutigiuinnaq pisarpoq. Taamatut suleriaaseqartoqarneratigut nalinginnaasumik attartortittakkatut inissianut sanilliullugu inuusuttunut inissianut ilinniartullu najugaqarfiinut sukkasuumik innersuussisoqarsinnaasarpoq."

    • "Ilinniartut najugaqarfii Iserit-ip Kommune sinnerlugu aqutaanut tunngatillugu aamma immikkut tulleriissaarinermi malittarisassaqarpoq, tassaasut Majoriaq Kommuneqarfik Sermersuumiittoq, taakkua illoqarfinni ataasiakkaani kommunip ilinniartunut najugaqarfiutaanut tulleriissaarineq isumagisarpaat."

     

    Ilinniartut najugaqarfianni imaluunniit attartortitatut inissiami oqoqarneranik ajornartorsiuteqarneq pillugu Iserit-imut saaffiginnittoqarnerani Iserit-imi suut suleriaaserineqarpat?

    • "Inissiaq misissuiffigiartorlugu alakkarneqartarpoq. Isugutammik ajoqusertoqarsimaneranik malunnartoqarpat, inissiami isugutak annertuallaarpat allatulluunniit isugutattoqarpat, R&T imaluunniit ACS inniminnerneqartarput ajoqusiisinnaasunik annertuunik misissuiartorteqqillugit inillu iluani silaannarmik uuttuiartoqqullugit. Isugutammik ajoqusertoqarsimanera paasineqarpat immaqalu oqoqarpat, attartortoq utaqqiisaasumik inigitikkallarneqartartumut innersuunneqassaaq. Iserit A/S utaqqiisaasumik inigitittakkanik peqarpoq, inissiaq attartugaq annertuumik iluarsartuunneqassatillugu atorneqartartunik. Tamakku saniatigut Iserit A/S utaqqiisaasumik inissianik nalinginnaasunik peqarpoq, inissiaq attartugarineqartoq sivikitsumik iluarsartuunneqassatillugu atorneqartartunik, assersuutigalugu imermik ajoqusersimatillugu."

    • "Inissiani piffissami qularnaveeqqusiiffiusumi imermik isugutammillu ajoqusertoqarsimappat, entreprenørit akisussaasut attaveqarfigineqartarput kukkunernik amigaatinillu iluarseeqqullugit, taavalu Iserit attartortup inigigallagassaanut innersuussilluni ikiuuttarpoq, nalilerneqarpat tamanna pisariaqartinneqartoq."

     

    Inissiamik attartortoq imaluunniit ilinniartut najugaqarfianni attartortoq, oqoqarneranik pasitsaassaqartoqartillugu sunik periarfissaqarpa?

    • "Inissiaq imermik isugutammilluunniit ajoqusersimasoq annertuumik iluarsartuunneqassappat, inissiamik paarsinerlunnermik peqquteqanngitsumik, nalinginnaasumik suleriaaseq malillugu iluarsartuussinerup nalaani inigigallagassamut attartortoq innersuunneqartarpoq, najukkaminullu uteqqittarluni. Inissiani nalinginnaasumik attartortittakkani (ilinniartut inuusuttullu najugaqarfiiniinngitsoq), Qaqutigoortumik inissiamut taarsiullugu nuunnissamik neqerooruteqartoqartarpoq, nutarterilluni iluarsartuussinissaq sivsuumik pisappat imaluunniit nalilerneqarpat inissiat arlallit blokkimi ataatsimiittut ataatsikkut nutarternissaat pisariaqartinneqartoq."

     

    Oqoqarneranik suleriaatsit malinneqarnersut pillugit arlaatigut nakkutilliisuutitaqartoqartarpa, tamannalu qanoq ingerlanneqartarpa?

    • "Attartortoq inissiami isugutattoqarnera pillugu saaffiginnissuteqarpat, attartortoq pulaarneqassaaq inissiallu iluata silaannaa qanoq ililluni pitsaanerulersissaneraa pillugu siunnersorneqartarluni. Ilitsersuutit tamakkua attartortut iserternerini tunniunneqartarput, aammalu inissiap iluata silaannaa qanoq pitsaasuutinneqassanersoq pillugu Iserit nittartagaani pissarsiarineqarsinnaapput. Attartortut aamma paasitinneqartarput isugutak oqullu peernissaat namminneq akisussaaffigigaat, isugutattoqalersimaneranut inigisamik kukkusumik paarsineq kisimi pissutaasimappat, tamannalu amerlanertigut pisarpoq. Qaqutigoortorujussuuvoq Iserit A/S´ip kukkusumik inissiamik paarsineq pissutigalugu isugutammik oqummillu peqquteqartumik iluarsartuussisoqarneranut inissianik attartortut aningaasartuuteqarnissaannik piumasaqartarnera."

    • "Iserit A/S sulisuminik, Inspektørinik Teknikerinillu inissiani isugutammik oqummillu suliaqarnissamut pikkorissartitsisarnernik ilinniartitseqqittarnillu ingerlatsiuartarpoq. Iserit´imi inspektørit Teknikerillu aamma inissiap iluani silaannarmik uuttortaanernik assigiinngitsorpassuarnik suliaqartarput, inissianilu oqoqarneranik misissuisarlutik. Kisianni Iserit A/S aalajangersimasumik isumaqatigiissuteqarpoq R&T-mut imaluunniit ACS-imut, pingaartumik inissianik inigineqanngitsunik iluarsartuussinissanut atatillugu."


    Ilinniartut najugaat attartortinneqarnissaat sioqqullugu misissuisoqartarpa?"

    • "Aap, anisoqassatillugu isertertoqassatillugulu tamatigut misissuisoqartarpoq."

     

    Ilinniartut najugaata ineeqqap iluarsaartuunneqartariaqarnera qanoq nalilersorneqartarpisiuk, attartortussap nutaap isertinnginnerani?

    • "Ilinniartut najugaqarfiini ukunani Marlulissat C.E. Jansensvej 1-imiittuni immikkut ittunik malittarisassaqarnera pillugu paasissutissiissutigineqartarpoq."

    • "Inissianik inigineqanngitsunik nalinginnaasumik iluarsartuussisarnermut tunngatillugu, Iserit A/S akinik aalajangersimasunik isumaqatigiissuteqarpoq, qalipaasunut 7-nut assigiinngitsunut, assersuutigalugu ataatsimik initalik gruppe A-tut qalipanneqassappat 5300 kr.-nik akeqarluni."

    • "Ilinniartut najugaanni attartortut qaammatini 3-ni qularnaveeqquteqarput, annerpaamik 900kr.x3 amerlaqataannut. Assersuutigalugu nalilerneqarpat ineeraq gruppe A-tut qalipanneqassasoq, taava ineeraq piffissami sivisuumi iluarsartuunneqarnerata nalaani inigineqassanngitsoq, ineeqqamillu qimatsisup akiligassaanik imaluunniit ineeraq tulliatut attartortussap sukkanerpaamik atoqqissinnaalernissaanut piareertussanngussavaa."


    Ilinniartut najugaqarfiat allamik attartorneqalernerani iluarsartuunneqassanngippat, iluarsartuunnissaata tungaanut taava qanoq sivisutigisumik utaqqisoqassava?

    • "Najugaqarfimmik qimatsisoqassatillugu tamtigut misissuisoqartarpoq, iluarsartuunneqassanersorlu nalilersuisoqartarluni. Aamma amerlanerpaartaat qalipaasoq peqatigalugu misissuiartortarpugut, taassuma naliliiffigissammagu najugaqarfik qanoq iluarsartuunneqarnissamik pisariaqartitsinersoq, Gruppe A, B imaluunniit C malillugu iluarsartuussisoqassanersoq."

     

    Inussiarnersumik inuulluaqqusillunga / Med venlig hilsen

    Torben Kortegaard
    Pisortaq/ Direktør