Skip til hoved indholdet

Iserternissaq sioqqullugu

Uterit

Inissiamik attartugassamik neqeroorfigineqarneq pillugu nutaarsiassap nuannaarutiginerani apeqqutissat assigiinngitsut takkussuutilertarput kiisalu iserternissamut atatillugu suliassanik pingaarutilinnik eqqarsaatigisassaqarputit:

  • Najugaqarfimmi malittarisassanik atuarluarnissat pingaaruteqarpoq.

  • Tamatuma kingorna attartornermut isumaqatigiissut atuaqqissaassavat atsiorlugulu.

  • Qularnaveeqqut + ineqarnermut akiligassaq siulleq akilerneqarsimasut Iserit A/S-imit takuneqarsinnaalerpata matuersaatit ilinnut tunniunneqarsinnaalissapput, aamma tassani qaqugu iserternermi misissuisoqassanersoq isumaqatigiissuteqassaasi.

  • Suut tamarmik ajoquteqannginnissaat qulakkeerniarlugu Iserit A/S-imi inissianik nakkutilliisoq peqatigalugu iserternermi misissuissaatit.

  • Iserternermi misissuinermi takuneqanngitsoorsimasunik isertereerninni ajoqutinik maluginiagaqaleruit ullut 14-it qaangiutsinnagit tamanna Iserit A/S-imi Ingerlatsinermut Immikkoortortaqarfimmut nalunaarutigineqassaaq.

Attartornermut isumaqatigiissut

Initaarsimanerit Iserit A/S-imit uppernarsarneqarsimappat attartornermut isumaqatigiissut atsiugassaq tigujumaarpat.
Qularnaveeqqummut akiligassap aamma qaammammut siullermut ineqarnermut akiligassap kiisalu allakkap iserternerit pillugu paasissutissanik pingaarutilinnik imallip attartornermut isumaqatigiissummut ilanngunneqarumaarnerat eqqumaffigissavat.

Qularnaveeqqut

Inissiani attartukkani tamani qaammatini tallimani ineqarnermut akiligassat nalinganik qularnaveeqqummut akiliisoqartarpoq.

Qularnaveeqqutip qaammatini 12-inut agguarlugu akilersorneqarnissaanut qinnuteqartoqarsinnaavoq. Qularnaveeqqutip naafferarlugu akilersornissaa kissaatigigaanni uku Iserit A/S-imut tunniunneqassapput:

Akissarsiat allagartaat kingulliit pingasut, ukiumoortumik naatsorsuut kingulleq kiisalu aningaaserivimmiit aningaasaqarnermut takussutissaq. Ukiunilu kingullerni pingasuni Iserit A/S-imut akiitsoqarsimaguit qularnaveeqqut naafferarlugu akilersorsinnaanngilat isertinnginnermilu qularnaveeqqummut akiligassaq tamaat akilerneqassaaq.

Inissiaq qimareerukku qularnaveeqqut aningaasartuutinut ilanngaatigineqarumaarpoq. Tamatumalu kingorna qularnaveeqqut tamakkiisumik ilaannakuusumilluunniit tigussanerlugu imaluunniit akileeqqissanerlutit paasiumaarpat.

Matuersaatinik tunniussinerit il.il.

Qularnaveeqqut + ineqarnermut akiligassaq akilersimagitit Iserit A/S-imiit takuneqarsinnaalerpat inissiamut attartukkamut matuersaatit tigujumaarpatit.

Iserternermi misissuineq

Iserit A/S-ip Inissianik nakkutilliisua initaanni misissuissaaq aamma ajoqutinut amigaatinullu nalunaarusiussaaq, taannalu illit atsiussavat, taamaalillutik inissiap qimannerani ilinnut akiligassanngussanngimmata.
Sapaatit akunneri marlut siulliit iluani, nutsereernerup kingorna, amigaatinut allattuinissannut periarfissaqarputit, iserternermi misissuinermi takuneqanngitsooneqarsimasut nalunaarutigalugit.  Allattukkatit Iserit A/S Ingerlatsinermi immikkoortortaqarfianut tunniutissavatit.

Illumi pigisanut sillimmasiineq

Iserteruit illumi pigisanut sillimmaserit. Ikuallattoqarneranut, pigisavit ajoqusernerannut il.il. atatillugu ajoqusernerit iluarsaannissaannut aningaasartuutit illit sillimmasiininnit matussuserneqassapput.

Nuunneq nalunaarutigiuk

Nuunnerit www.sullissivik.gl aqqutigalugu inuit allattorsimaffiannut nalunaarutigiuk. 

Errorsivimmik, erruissummik panersaavimmillu ikkussinerit

Inissiami illit attartukkanni errorsivimmik, erruissummik panersaavimmillu ikkussuisoqannginnerani pingaarutilimmik qanoq iliornissamut piareersaasoqassaaq.

Kukkusumik ikkussuinerup kingunerisaanik erngup ajoqusiinera pissutigalugu annertuumik aningaasartuuteqarnera aamma illuutit atortullu ajoqusernerannik kinguneqarsinnaanera pissutigalugit Iserit A/S aqqutigalugu najugaqartutut nammineerluni errorsivimmik, erruissummik panersaavinnillu ikkussuisoqaqqusaanngilaq.

Inatsit naapertorlugu erngup ajoqusiinera piaaraluni iliuuseqarnertut isigineqarpoq, taannalu inissiamik attartukkamik atorunnaarsitsinermik kinguneqartarpoq attartortumullu aningaasatigut kinguneqassalluni.

Taamaammat atortut pineqartut ilisimasalinnit ikkussorneqassapput, taakkununngalu aningaasartuutit attartortumit akilerneqassapput.

Tamatuma saniatigut immersugassamik ikkussuinissamut qinnuteqaammik immersuinikkut atortut pineqartut ikkussornissaannut Iserit A/S-imut akuersissummik piniartoqassaaq.

  • Attavissat

    Iserit A/S-imut qanoq attaveqassanerlutit uani takuuk.